البت باتـعه....بنت زيد عبد الصبور

استعرض الموضوع السابق استعرض الموضوع التالي اذهب الى الأسفل

البت باتـعه....بنت زيد عبد الصبور

مُساهمة من طرف سجده في الأربعاء 15 سبتمبر 2010, 2:59 pm

البت باتعــــــــــــــه


للشيــــــــخ أمــــين الديب


البت باتعه... بنت زيد عبد الصبور
اللي أمها يوم عرسها
كان عفشها... حلّة وبابور
ومعاه كمان صندوق خشب
كان أصله سحارة صابون
فيه بنستين والمكحلة
ومراية والفلاية والملقاط
وحجر وليفة ومبخره
وقزازة كان فيها البخور
وجوز صحون
ومنٍخُلين..
والطشت والقروانه والغربال..
ومقشّه ليف...
ومقشتين عرجون
وزير وزلعة وقلتين وماجور
وحصيره من سوق التلات
ولحاف بإيدها منجداه
ومخدتين
والوش كان دمُّور

في الانفتاح
علي رأي صاحبي ولانبطاح
وفتحنا مصر سداح مداح
ونسينا حي علي الكفاح
والشعب محكوم بالسلاح
اتلخبطت كل الأمور
وقيم كتير
وعادات كتير اتغيرت
من ضمنها غًلو المهور

البنت دي
بنت أم باتعه
مش عاجبه حد في مشيها
إكمنًّها.. مشيت طريقها لوحدها
والأسرة غابت عنًّها
مشغولة عنها بعبئها
سايبينها هيًّ وشأنها
وإكمنًّها مستهدفه
الأجنبي ومعاه غبي
فكّر لها
قال أولا:
ترفض معيشة أهلها
ترفض أوامر ربها
ترمي الحياء والانتماء ورا ضهرها
تقطع جدورها بنفسها
أوعز لها
إزاي حتعرض لحمها
وتبان مفاتن جسمها
من ضفرها.. لأعلي خصله ف شعرها

عمل الصالات... تعرض موضات
والاعلانات... ماليه الشاشات
بالشنبوهات والتسريحات
وحاجات كتير فرحت بها
تاهت ونسيت نفسها
وتكلًّمك ربع الكلام بالأجنبي
وتقول هالو...
بنت أم باتعه تقول هالو
مرسيه يا شوشو وثانك يو
وكَمٍ يا توتو وياللا جو
وكبار شيوخ المسلمين
ما عرفش ليه مًتلجًّمين
والمسئولين... فتحوا الببان علي وًسعها

قام قال سلامة ألمًّها
يمكن تغيّر فكرها
ترجع لدينها وربها
وتعيش حياتها بحلوها وبمرها
راح لـ أمها...
يخطبها منها وقال لها
بصراحه بنتك..
عاوزه حد يلمّها
وأنا قدّها
قالت: وماله
البنت يلزمها الجواز
شخشخ جيوبك.. واشتري ياللا الجهاز
قال: اطلبي...
قالت: تجهز شقه.. قد أربع إوض
أحسن نابوليا في البلد
وتجيبها من دمياط
وتجيب نجف من غير عدد
والمكنسة بشفاط
والدِش قبل الدٌش
والفيديو والبوتاجاز
وتجيب لها تلاجة ستاشر قدم
وتجيب لها قبل الجواز...
الفرو والمحمول
وتجيب لها غسالة فول
أنا قصدي فول توماتيك
شقتها كاملة..
زي أي بوتيك
وتجيب لها قبل الجهاز
الشبكة طقم من الدهب
أنا مش حاقولك ألماظ
وتجيب لها فستان زفاف
من غير كمام من غير كتاف
علشان يبين صدرها
وتبان مفاتن جسمها
وتجيب غوازي تزفها
واللي اسمه إيه شهر العسل
في الشرم واللا الغردقة
وبلاش أمور البعزقة
آدي مطلبي
إن كنت قادر مهرها
قرَّب لها
أنا مش حاميّل بختها..

قال: يا ام باتعه حاجيب منين
أنا لاني راجل مرتشي
ولا أحب أجيب بالدّين
ولا أرضي بالتقسيط..
الطاق بيبقي طاقين
ويكتّبوني شيكات
أو أمضي علي ايصالات
علي إنها امانات
وحكاية مش هيّ
لو بس فات شهرين
مادفعتلوش قسطين
بدل المحامي اتنين
حايجيب له رفض الشيك
ومصيبه وقضيه
ومش حاقولك عالقرف
وحاجات مخلًّه بالشرف
اما البوليس والمحكمه
حابقي ف نظرهم منحرف
وباكسر القوانين
شوفي يا ام باتعه
أنا عندي شقه محندقه
معقوله ماهش ضيقه
فيها يادوب أوضتين
وعملت جمعيه
مع ناس أماره زيكم
وقبضتها ألفين
وادي اللي عندي وقلتلك بصراحه
وبإذن واحد أحد
ربًّك حايفرجها..
وباتعه حتريَّحك.. وتعيش مرتاحه

قالت له: قم من هنا
قم فضها سيره
أنا احترمتك.. عشان الأهل والجيره
بتقولي الفين جنيه?!!
وانا اللي قال بافتكر..
باتعه حاتخد بيه
حافظ علي كلمتك يا اهبل..
وخلًّيك زوق
دي باتعه طول عمرها
دايما تبص لفوق
لاحمر ولاخضر
وشي محزَّق وبنطلونات
والشعر فوق كتفها سايح
وفي الكوافير
مش كل طير يندبح
خد دش وانت تفوق
وتفوق لنفسك
وتتكلم كلام موزون
وفرضنا انت اللي عاقل
والمستمع مجنون !
ألفين جنيه للغوازي واللا للمأذون?!!
فيه ناس كتير زيكم مش عايشة في الدنيا.
مابتسمعوش الرداوي.. واللا تلفزيون?!!
شفت اللي بيقدمه الحاج متولي?!!
الشقه بالعفش كامله..
وفلوس كتير في البنك
كتبه لعروسته..
دَا غير اللبس والمصاريف
شايفاه بعيني
ولا واحد غريب قالًّلي
كل المسلسل تابعته دقيقه بدقيقه
والحاج متولي إلاهي لم يشوف ضيقه
راجل صحيح مًقٍتًدًر
كل البنات عاوزاه
وباتعه بنتي..
إلاهي يكون نصيبها معاه
مش جاي تقولي الشباب !!
أنا ناقصه هَمٍ تقيل

قال: يا ام باتعه اسمعيني
كل دا تمثيل
قالت له: ده قصر ديل
وبلاش كلام فاضي
الشعب راضي
مافيش غيرك عامل لي تقيل
ما تكونش ماهر يا شاطر
واسم أبوك عطار
والشاي علي النار
وقاعد لسَّه عالرمله
والحلوه تيجي تلاقيك
فارش لها المنديل.?!

قال: يا ام باتعه
دي ناس بتوزع الأوهام
ساعدوا العدو بجهلهم
في الحرب عالإسلام
وأنا مش بالوم جهلهم
اللوم علي الإعلام
قالت: خلاصة الكلام
أنا بنتي مش من وقمكم
شوفولكو ناس علي قدًّكم
أنا بنتي حلوه مثقفه
حافظه الأغاني كلها.
أحدث شرايط عندها.
دي لما تلبس بنطلونها الجينز
كل الشباب تجري وتخطب ودّها
ونانسي عَجرم نفسها
ما تجيش في خصله ف شعرها
ولا تيجي ضفر ف رجلها
طب والنبي...
لو شافها واحد أجنبي
ليجيب لها.
كل اللي ييجي ف نفسها






سجده
منسق تابع للإداره
منسق تابع للإداره

عدد المساهمات : 1079
تاريخ التسجيل : 24/08/2010
الموقع : مــصــــــــــــــــــــــــــر

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف الشروق في الأربعاء 15 سبتمبر 2010, 5:01 pm

على فكره بجد حلوه أوى يا سجده عجبتنى جدا

انا مش بقرأ شعر كتير بس لفتت نظرى وحاسه ان ليها تكمله ...لو ليها باقى ياريت تنزليه
avatar
الشروق
الأخصائيه النفسيه ...صديق الموقع

عدد المساهمات : 243
تاريخ التسجيل : 23/08/2010
الموقع : جمهورية مصر العربيه

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف فاروق المصرى في الأربعاء 15 سبتمبر 2010, 6:48 pm

قصيده ممتازه

سجدة شكرا لكى على الشعر المميز
avatar
فاروق المصرى
عضو متألق
عضو متألق

عدد المساهمات : 307
تاريخ التسجيل : 17/08/2010
العمر : 33
الموقع : مصر ام الدنيا

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف عذاري في الأربعاء 15 سبتمبر 2010, 8:35 pm

سلمت الاناااااامل
جزاكي الله خيرا
avatar
عذاري
منسق تابع للإداره
منسق تابع للإداره

عدد المساهمات : 12704
تاريخ التسجيل : 07/08/2010
الموقع : سلطنه عمان

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف سجده في الأربعاء 15 سبتمبر 2010, 8:37 pm

شروق حبيبتي تسلميلي

بس كده خلصت خلاص ومفيش تكمله بس الشيخ امين الديب تلقائي وبحب زجله جدا
لو نزل بقيه اكييييييييييييييييييييييد هنزلها تسلميلي

لا شكر علي واجب يا بشمهندس نورت الصفحه

سجده
منسق تابع للإداره
منسق تابع للإداره

عدد المساهمات : 1079
تاريخ التسجيل : 24/08/2010
الموقع : مــصــــــــــــــــــــــــــر

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف سجده في الأربعاء 15 سبتمبر 2010, 8:38 pm

نورتي يا عذورتي

بارك الله فيكي

سجده
منسق تابع للإداره
منسق تابع للإداره

عدد المساهمات : 1079
تاريخ التسجيل : 24/08/2010
الموقع : مــصــــــــــــــــــــــــــر

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف نوسة في الجمعة 17 سبتمبر 2010, 11:12 am

هههههههههههههههههههههههههههه

حلوة موووووووووووووووووووووووووووووت يا سجدة
avatar
نوسة
منسق تابع للإداره
منسق تابع للإداره

عدد المساهمات : 969
تاريخ التسجيل : 09/08/2010
العمر : 26
الموقع : فى بحر الخيال

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف k_I_A_S_B في الجمعة 17 سبتمبر 2010, 1:27 pm

الفن الأصيل

هو الذى يغنى بالواقع ويضرب على نغمات العصر ومشكلات المجتمع

والفنان الأصيل هو الذى يحاول إصلاح عيوب المجتمع وإظهار الطفرات الغريبه والتحذير منها

وقد نجح الشاعر فى توصيف حاله سيئه يمر بها المجتمع وذلك عبر مثال فردى ينم عن حاله جماعيه من التبعيه العمياء والأنهيار الفكرى

فأستطاع بأسلوب يصل لقلب الإنسان البسيط أن يوضح فكره مهمه وان يعلن عن قضيه خطيره

فأستحق إشاده بدرجه أمتياز

شكرا يا سجده على النقل المبدع للشاعر المبدع

تم التثبيت فتره حتى تعم الأستفاده

k_I_A_S_B
محبكم دائما وأبدا
محبكم دائما وأبدا

عدد المساهمات : 667
تاريخ التسجيل : 06/08/2010
الموقع : مصر

http://wecando.forumpro.org

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف لؤلؤة في الجمعة 17 سبتمبر 2010, 1:50 pm

حلووووووووو اووووووووووووى يا سجدة
عجبنى مووووووووووووووت
تسلم ايدك
avatar
لؤلؤة
منسق تابع للإداره
منسق تابع للإداره

عدد المساهمات : 774
تاريخ التسجيل : 08/08/2010

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف سجده في الجمعة 17 سبتمبر 2010, 8:39 pm

تثبيت مره وااحده

جزاك الله خيرا يا د.خالد ربنا ما يحرمنا منك ابدا
وانا سعيده انه عجبكم ومتشكره جدا ليكم

ونو سه ولولو نورتوني يا حبايبي

بارك الله فيكم

سجده
منسق تابع للإداره
منسق تابع للإداره

عدد المساهمات : 1079
تاريخ التسجيل : 24/08/2010
الموقع : مــصــــــــــــــــــــــــــر

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف أميرة بكلمتي في الجمعة 24 سبتمبر 2010, 2:04 pm

السلام عليكم ورحمة الله وبركاته

سجدة

كلمات رائعة

تسلم يديك على الأختيار

الشكر لك

سلااااااااااااااااااااااام
avatar
أميرة بكلمتي
عضو راقى
عضو راقى

عدد المساهمات : 1832
تاريخ التسجيل : 09/08/2010

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف ganna في الثلاثاء 21 ديسمبر 2010, 12:57 pm

قصيدة رائعة وانا من محبى اشعار الشيخ امين . وقد حضرت له اكثر من أمسية شعرية .وهو شخصية مرحة ومثقفة
avatar
ganna
عضو صاعد
عضو صاعد

عدد المساهمات : 31
تاريخ التسجيل : 18/12/2010

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف الطائر المهاجر في الثلاثاء 29 مارس 2011, 11:41 pm

ليها تكمله يا د سجده وانا بغنيها مع خالد كتير

لانها منطبقه على حالى وعلى حال شباب مصر

والشيخ امين هو اللى ألهمنا فكرة إلغاء المهر والشبكه

وقولت لخالد نعمل حمله

زواج دون مهر او شبكه بس فشلنا ههههههههههه

الطائر المهاجر
عضو متألق
عضو متألق

عدد المساهمات : 141
تاريخ التسجيل : 18/02/2011
العمر : 37

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف سجده في الأربعاء 30 مارس 2011, 2:28 pm

هههههههه اه فعلا ليها تكمله يا دكتور وانا سمعتها من زمان وتكملتها روعه بس نسيت انزلها ان شاء الله انزلها او حضرتك ممكن تنزلها وعلي فكره الحمله ديه ممتازه وممكن كلنا نشترك معاكم فيها بس المشكله في الأهل ودي مشكله صعبه جدا عندهم ومش عارفه ليه بيقيسوها بمقياس غريب وهو ان الزواج بدون شيكه ومهر بيكون سهل والزوج متعبش فيه والجملة الشهيره اللي بتقول بنتنا مش رخيصه يعني الشباب حالهم صعب ومش لاقيين يتجوزوا والبنات كمان مش لاقيين حد يتجوزهن هههههههه من سوء الحاله الاقتصاديه بس علشان نبقي منصفين في ناس كتير دلوقتي تفهمت الوضع ده ومش بتغالي في الشبكه والمهر وبتلتزم اولا بمواصفات الزوج المسلم وهيا الدين والخلق وبتكون متفهمه وبتيسر هذا الامر وربنا يصلح الأحوال وجزاكم الله خيرا

سجده
منسق تابع للإداره
منسق تابع للإداره

عدد المساهمات : 1079
تاريخ التسجيل : 24/08/2010
الموقع : مــصــــــــــــــــــــــــــر

الرجوع الى أعلى الصفحة اذهب الى الأسفل

رد: البت باتـعه....بنت زيد عبد الصبور

مُساهمة من طرف سجده في الأربعاء 30 مارس 2011, 3:21 pm




تكملة القصيده



أنا بنتى عايزة جدع
عاقل يكون كسيب
أبوه فى حزب اسمه ايه
ويكون من المحاسيب
أو زى ابن أم بطة
شغال على التهريب
أو من بتوع النوادى
أو يكون لعيب
الجون بمليون جنيه

ويغيظ أمين الديب




قال : يا أم باتعة

اللى يرضى بالحلال هايعيش

مفيش بيوت تتبنى
بالغش والتهبيش
هيه الأغانى تداوى
أم عين عورة ؟
ولا الدول تنبنى
بالفن والكورة ؟
وياريته فن بصحيح
لكن مالوش قيمة
فن الجريمة بقى ع الشاشة والسيما
وعاداتنا حتى القيم
اتقطعت أشلاء
فقد الشباب الانتماء
بس المهم يعيش
تايه مابين الفراعنة
والعرب وقريش
وعلموه الاستكانة
لاجل أكل العيش
وغصب عنه اتحكم
بفتوة والألاضيش
عايزين نعيش يا أم باتعة
زى خلق الله
نحمى الشباب من الفتن
وبلاش من المغالاة
اللى انتى عارفاه حرامى
بس مش شايفاه
سرق عقولنا وأخلاقنا بتليفزيون
صنع سلاسل وساحبك
وانتى ماشية وراه
قالت له : قوم يا ابن زاهية
يا ابن أم عين حولة
عمال تلقح كلام
وتعيب ثقافة السلام
هوه انت من دوله ؟!!!
قوم فز غور من هنا
قوم غور ماتحبسناش
بتجيب فى سيرة اسمه ايه
والفجر لسه ماجاش ؟!!!
فاكر فى يوم اسمه ايه
يوم احتفال اسمه ايه
ساعة ما مات اسمه ايه
وجه بداله اسمه ايه
عمل قانون اسمه ايه
وده مخلى اسمه ايه
يقطع لسان اسمه ايه
لو جاب فى سيرة اسمه ايه
عقبال سلامة ابن ايه
ويحطه فى اللى اسمها ايه
من غير محاكمة اسمها ايه
تقعد سنين منحاش
فكرك تحوش اسمه ايه
هوه اسمه ايه ينحاش
قال : يا أم باتعة انتى ايه
قصدك تخلى اسمه ايه
يحبسنى فى اللى اسمها ايه
من غير محاكمة اسمها ايه
أقعد سنين منحاش
أنا جبت سيرة اسمه ايه ؟؟
وفرضنا قلت اسمه ايه
ماهو برضه ماغلطناش
قالت : خلاص فضنا
يا تقوم تغور من هنا
أنا بنتى زى القمر
لسه عريسها ماجاش
عايزاه يكون مقتدر
ويكون كبير يا بلاش
أنا ناقصة هم الشباب
والنفخة ع الفاضى
فاكرنى مكتب شئون
هاديكو بنتى بلاش
قوم فز غور من هنا
قوم فضها سيرة
والباب وراك تقفله
واتهوى فى السيرة
واوعاك تعتب هنا
لو ليك كرامة صحيح
أصل اللى زيك كده
الدم عنده شحيح
وان كنت بالشكل ده

يوم خارجتى ماتجيش




خرج يقول : يامسلمين

يا ولاة أمور المسلمين اللوم لمين

للمسئولين ولا الحرس
يا مثقفين دقوا الجرس
ماله الجرس صابه الخرس
اوعاك تقول ان الودان
صابها الصمم
اوعاك تقول الناس كمان
زى الغنم
مابيفهموش
وبلاش تكونوا بجهلكم
أو حتى فى ناس منكم
بينفذوا تخطيط لبوش
فتش ... وشوف الجرح فين
وضح ... وقول للمسئولين
وبلاش من النوم فى العسل
وبلاش كسل
وياريت تكونوا القدوة
وتكونوا المثل
وبلاش تعرض سمعتك للقيل وقال
وبلاش طريق الهلس والبطال
بكرة التاريخ هايغربلك
ويغربل الأعمال
فى ناس تعيش
وناس تموت ولا تتنسيش
وناس تموت تحت النعال
وفى كتب زى الدهب
وفى كتب من غير تمن
يرموها للزبال
يا مثقفين فين جهدكم
والمشكلة قدام عنيكم كلكم
قدامكو فرصة عمركم
راقبوا البرامج كلها
واتفكروا واستفسروا القصد ايه من بثها
ومين ومين م المسئولين صرح بها
وفين شيوخ المسلمين
عشان توقف عرضها
واللوم لمين
ياكبار شيوخ المسلمين
قولوا بصراحة ع الملأ
لو واحدة تعرض لحمها
ولا تختشيش على دمها
ولا تستحيش من ربها
مهرة ومن غير لجام
يا كبار شيوخ المسلمين
عايزين امام
يصرخ يقول لوزارة الاعلام
حرام
وبجرأة يعلن كلمته
علشان يبرأ ذمته
يعمل حساب يوم دفنته
يعمل حساب يوم الزحام
قدامكو عام
والزحف جاى م العولمة والأمريكان
وخلاص بدأ شد الحزام
يا أيها الحكام
ماتغيبوش وعى الشعوب
بالشرطة والاعلام
الكيل طفح
وادى الشعوب بتقولكم
قدامكو فرصة عمركم
قدامكو عام

يا تقولوا ع الدينا السلام


سجده
منسق تابع للإداره
منسق تابع للإداره

عدد المساهمات : 1079
تاريخ التسجيل : 24/08/2010
الموقع : مــصــــــــــــــــــــــــــر

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى